رائج
محمد بشير الدولي المصدر الفيس بوك

الدولي: قالوا عني (فورة أندروس).. وماحصل زول (دق بابي) رجع مكسور الخاطر

بعد أيام قلائل من إصداره لأغنية جديدة حملت اسم (الجدي) قبيل عامين، خطف الفنان الشاب محمد بشير الدولي اهتمام الجمهور، وحققت أغنيته تلك أكثر من ٥ مليون مشاهدة على يوتيوب .

بينما تم تداولها على نطاق واسع داخل الشارع العام السوداني، خصوصاً في المركبات العامة والمطاعم وحتي (الركشات)، وهو مقياس شعبي معترف به لمعرفة مدى نجاح الأغنية، (خرطوم ستار) جلس مع محمد بشير وحاوره في العديد من النقاط، فماذا قال ؟

بداية كلمنا عن جدول حفلاتك وهل صحيح أنك مرتبط حتى نهاية العام ٢٠٢٠ كما يتردد؟

يضحك: الحمد لله جدول حفلاتي تمام التمام، بس حكاية إني مرتبط لحدي نهاية ٢٠٢٠ دي (زادوها حبة محلبية).

عدادك خرافي، وتحولت مؤخراً لفنان (طبقات ارستقراطية ) .

والله دا كلام غير صحيح إطلاقاً، صاح ممكن يكون في ارتفاع عام في أجور كل الفنانين، بس كمان نحن سودانيين، ووالله العظيم مافي زول (دق بابي) ورجع مكسور الخاطر .

عند بلوغك قمة الشهرة وصفك البعض بـ(السريع الذوبان) وبأنك لن تصمد طويلاً في القمة ؟

أزيدكم كمان من الشعر بيت، قالوا عني (فورة اندروس) وحاجات كتيييرة، بس عمري ما ركزت في الكلام دا، لأنو عندي هدف وأضح ماشي عليهو وماعايز أي تشويش .

ماهو ذلك الهدف ؟

تسجيل اسمي ضمن عظماء الفن السوداني في المستقبل والحفاظ على اسم والدتي الكبير ناصع البياض.

بمناسبة والدتك، من المقولات الشهيرة أيضاً (لولا حنان بلوبلو لما كان محمد بشير الدولي ) .

طبعاً، ودي ماعايزة أي نقاش، وقبل الفن زاتو لولا والدتي الحبيبة لما أتيت للدنيا… و… مقاطعة… مانعنيه انك استغليت اسم والدتك للترويج لنفسك وسخرت علاقاتها لخدمتك.

يضحك: ياجماعة أنا بغني من 15 سنة، وما أشتهرت إلا لما غنيت (الجدي) يعني الناس عرفتني بي غناء حقي ماحق أمي، بعدين لو أنا فعلاً زي مابقولوا استغليت اسمها وعلاقاتها، مش مفروض أشتهر من بدري؟ ليه صبرت السنين دي كلها؟

إبان اعتصام القيادة حملك الثوار على الأعناق، لماذا ؟ مع العلم أنك لم تُقدم شيئاً وطنياً لافتاً أو دعما قوياً مباشراً .

في حاجات مابتتقال، لأنو لو اتقالت بتفقد معناها وحتى الناس ماحاتحترمك نهائي، يعني العملتو أنا في الثورة ماممكن أجي وأقولو الآن لأنو أنا عملتو عشان البلد ماعشان أظهر أو (أتنفخ) قدام الناس، ولمعلوميتكم أنا خلوني، انتو عارفين أنو أمي الله يديها الصح والعافية كانت بتطلع في المواكب عديل وكم مرة جابوها البيت مغمى عليها بسبب البمبان ؟

يقال أن علاقاتك بالفنانين الشباب ضعيفة، وصداقاتك داخل الوسط محصورة جداً .

هذا صحيح، أنا أفضل أن يكون هناك فاصل مابيني والآخرين، وذلك لحفظ الود والإحترام، ولا أعتقد أن هذا عيب أو شيء مكروه.

من هو أقرب أصدقاءك من الفنانين الشباب ؟

أحمد الصادق.

ومن هو الفنان الذي يضع له الدولي ألف حساب؟

أنا لا أشغل بالي بمثل هذه الأشياء، أنا أركز فيما أقدم وحسب، و (جمهوري) فقط هو من أضع له ألف حساب .

المصدر: خرطوم ستار

اترك رد

X
X