رائج

د.غادة كريم: الديرمارولر لبشرة ناعمة وشباب يدوم

الديرمارولر هي أداة تحتوي على تجمع من الإبر الدقيقة التي تستخدم لوخز البشرة وفروة الرأس لأغراض تجميلية عديدة، وهو عباره عن اداه بلاستيكيه فيها نهايه دائرية بها أبر صغيرة

كيف يعمل الديرمارولر :

مبدأ الديرما رولر بسيط، فعند تمرير الرأس المحتوي على الإبر الدقيقة على البشرة، تقوم هذه الإبر باختراق البشرة وصولاً إلى عمق معين لتساعد على تفتيت النسيج المكون للندوبوالمساعدة على تجديده.

كما تتسبب الديرما رولر برد فعل شفائي لدى الجسم، فيبدأ بإنتاج خلايا جديدة وكميات كبيرة من الكولاجين والإيلاستين في المنطقة التي تم تمرير الديرما رولر عليها.

ويستطيع المستخدم تكرار العملية لدى الطبيب أو في المنزل عدداً معيناً من المرات، قبل أن يتمكن من رؤية نتائج ملحوظة بعد البدء بفترة لا تقل عادة عن 3-6 أشهر

الحاجه الثانيه :

الديرمارولر بيساعد في امتصاص اي شيء تضعيه في وجهك بعد ما تخلصي من الجلسه ..

يعني اي كريم عاوزه تعمليه ح تلقي نتيجه مباشره..عشان كدا استغلي الفرصه واختاري الكريمات المناسبه الي ح يستفيد منها وشك كتييير في المرحله دي..

الحاجه الثالثه :

بيزيد التدفق الدموي لبشرتك وبالعربي كدا بيرجع ليها الحياة

 كيف نختار الديرمارولر المناسب لبشرتنا ؟؟ 

طيب، قبل بداية استعمال الديرمارولر لازم تكوني عارفه مشكلتك شنو؟ وهدفك من استعمالو شنو؟؟ لان دي الحاجه البنبني عليها مقاس الابره..لان كل مقاس بيخدم غرض معين ..

النوع الأول: المقاس من ٠.٢- ٠.٣ ملم :

دا مقاس الابره بتكون رفيعه جدا جدا وقصيره يعني ابدا ابدا ما بتخدم ناس التجاعيد او المشاكل الكبيره.. دي بس لو عاوزه تأهلي بشرتك لاستخدام كريمات وتديها نظاره وتحسني من شكل الجلد العام ، ممكن حتى تستعمليها مرتين في اليوم ومافيها اي احساس بالالم مطلقآ..ممكن برضو يستعملوها البنات العندهم تساقط في شعرهم بيمشوها على فروه الراس النظيفه مرتين في اليوم قبل ما يستعملو الزيوت المناسبه او امبولات الشعر بتدي نتايج اقرب للخيال ..

النوع الثاني: المقاس ٠.٥ ملم:

دا اكتر مقاس مستخدم للوش .. بيشتغل على بعض مشاكل البشره زي التصبغات الجلديه او الندوب والحفر الصغيره وكمان بعض التجاعيد الخفيفه وعشان تقدري تشوفي نتيجه سريعه اعمليه مره في الاسبوع.

النوع الثالث: المقاس ١.٠ ملم:

دا المقاس الانا بعتبرو الحد الاقصى لاستعمال الديرمارولر للوش وبيدي نتايج مذهله بالجد، ممكن البعض يعتبرو مؤلم شويه والبعض بيستعملو معاه مخدر موضعي.

نقوم باستخدام هذا المقاس مره وحده في الشهر .

النوع الرابع: المقاس ١.٥ملم :

دا المقاس البيستخدم للجسم ما تعملوه في وشكم ابدا ..
الناس العندها علامات تمدد سواء من الحمل او السمنه او المناطق الفيها مسامات واسعه في الافخاذ ..

 كيف نستخدم الجهاز ؟؟

اهم اهم حاجه تتبعو التعليمات دي بالحرف الواحد عشان تصلو للنتيجه العاوزينها بدون مشاكل جانبيه..اول واهم خطوه قبل تبدي الاستعمال ان وشك يكون نظييييف تماما .. تغسليه بغسولك، بعد دا تجيبي قطنه تغمسيها في كحول وتطبطبي بس بيها على وشك كلو

اتاكدي انو بشرتك اساسا مافيها حبوب ملتهبه .. لان لو في جروح او حبوب ملتهبه لازم تعالجيها اول بعد دا تلجأي للديرمارولر.

الخطوة المهمة انو نفس جهاز الديرمارولر بتعقميه بكحول يكون تركيزو ٩١٪ (الراس قصدي) في طبعا سبراي كحول موجود في الصيدليات للاغراض دي ، بترشي كويس على الراس كلووو من كل الجهات عشان تضمني التعقيم الشامل ..

أنواع حهاز الديرمارولر الموصى بها من الدكتورة غادة كريم

تطبيق العمل على الوجه:

ممكن تبدي بحته صغنونه وممكن طوالي تبدي تحرثي منطقه كامله زي كامل الخد مثلا..

نبدأ في اتجاه واحد يعني مثلا من فوق ل تحت أو يمين شمال أو بشكل مائل..

تتاكدي انك بتمشي الرول على نفس المنطقه من ٧-١٠ مرات بنفس قوه الضغط يعني ما تخلي يدك شديده في منطقه ومرخيه في منطقه تانيه لا خليك منظمه ومن الاساس ما تضغطي شديد خلي يدك عاديه وبراك حتقدري تقدري نسبه الضغط المطلوبه منك.

تأكدي انك حرثتي كا الوجه بنفس الطريقه ونفس الترتيب..

وبكدا نكون انتهينا من الحراثه .. تقومي تعقمي جهازك بنفس طريقه رش الكحول وتخليه ينشف بعيد ..

الخطوه الأخيره والاهم هي توزيع (السيروم والكريمات)..

اهم حاجه تهدي وشك من الحرارة اول بجل الوڤيرا وبعد ساعة أعملي سيروم هايلارونك اسيد وباليل لما تجي تنومي اعملي سيروم فيتامين سي.

ملاحظه : حاولو دايما اعملو الديرمارولر بالنهار عشان ما تعملوه طوالي وتمشو ترقدو وبكون في احتكاك بين وشك والمخده الي نايمه عليها بشعرك فا ممكن وشك يلقط اي ميكروب.. 

وحاولو قدر الامكان تكونو ما شغالين اليوم التاني ولو مضطرين تطلعو لازم طبعا واقي الشمس ضروري جدا ..

رشحي لينا احسن نوع ديرمارولر؟

اي نوع ماركه بس اتأكدو من نسبه التيتانيوم في صناعه الابر تكون عاليه..

تحياتي..

المصدر: خرطوم ستار / إسراء عثمان

اترك رد

X
X