رائج
إنصاف مدني / مصدر الصورة: كوش نيوز

حصريا لـ(خرطوم ستار) إنصاف مدني تكشف ما حدث لها داخل ساحة الإعتصام

أثارت حادثة طرد الفنانة إنصاف مدني من اعتصام القيادة العامة الكثير من الجدل، خصوصا أن الحادثة جأت موثقة بفيديو يظهر خلاله عدد من الشباب وهم يقومون بترديد هتاف: (ما دايرنك… ما دايرنك)، ولعل هذا مادفع (خرطوم ستار) لتجلس مع إنصاف من أجل توضيح الحقائق وازاحة الستار عن تفاصيل ماحدث، فماذا قالت…

بداية حدثينا عن قصة طردك من القيادة.؟

والله مافي زول طردني، انا جيت وغنيت للجياشة والثوار وغنوا معاي كلهم، لكن فجأة ظهروا مجموعة من الشباب وبقوا يكوركوا فيني ويقول لي الجابك شنو، ونحنا ماعايزنك، في حين انه في الوقت داك تحديدا انا كنت بغني مع الناس.

يعني الحصل ماسلوك عام بل سلوك شخصي من نفر او اتنين عندهم رأي فيني وانا بحترم الحاجة دي، لانو في النهاية الثورة دي جات عشان اي زول يقول رأيو ومافي زول يحجر أو يصادر رأي اخوه.

ماهي علاقة إنصاف مدني بالنظام السابق ؟

ماعندي بيهو اي علاقة، ومافي فنان ضاق زيي الوان وأصناف العذاب من النظام السابق، والدليل على كدا مشكلتي البي سببها قعدت عشرة يوم في الحراسة وزول بالغلط سال فيني ولا قال يقيف معاي مافي.

وانا في عهد النظام السابق اضطريت اسدد ديون وشيكات قريب الـ25 مليار، ودا كلو عشان الفساد والغش الكان موجود والبتمنى انه ربنا تاني ما يعيدو ولا زول يضوق الضقتو والشفتو.

البعض يقول أن أحد أشقاء الرئيس السابق وقف الى جانبك في تلك المحنة؟

اها شفتو دي واحدة من الحاجات الناس ظلمتني فيها دون ماتتحرى، لانو الوقف معاي دا ما اخو الرئيس المخلوع زي مامفتكرة الناس، دا عبد الله البشير الشاعر ورجل الأعمال الشهير.

برايك… لماذا هاجمك اولئك الشباب بكل تلك القسوة؟

هم قالوا عشان انا جيت متاخرة، ولو كانوا عارفين السبب الخلاني جيت متاخرة والله العظيم ما كانوا عملوا العمايل دي.

اذا ماهو السبب؟

السبب انو انا عندي بتي راقدة عيانة ليها زمن، وانا البراعيها وواقفة في رأسها، والكلام دا هسي قرب من الخمسة شهور وزيادة..

ويااخوانا (الناس ظروف) وقبل ما الواحد يحكم على الناس يعرف الظروف اول، بعدين نحنا اولادنا قاعدين في القيادة من اول يوم في الاعتصام، يعني لو كان عندنا اي اعتراض على الثورة دي ما كنا خليناهم مرقوا ذاتو… ولا شنو..؟

سمعنا انك وتضامنا مع الثورة منذ انطلاقة الاحتجاجات رفضت تسجيل أي برنامج رمضاني؟

دا كلام صاح مليون في المية، انا رفضت أكثر من عرض جاني عشان اظهر في رمضان واغني لانو ماصاح اطلع واغني وفي شهداء ماتوا، ياخي لو ماعشانهم عشان خاطر امهاتهم البكون قلبهم مقطوع وهم بشوفونا قاعدين نغني في رمضان.

مقاطعة… لماذا اذا لم تقومي بإعلان هذا الامر كما فعل عدد كبير من الفنانين؟

ياجماعة، الاعلان لزومو شنو.؟… انا قررت مقاطعة القنوات وعدم الغناء عشان نفسي وعشان الشهداء الماتوا ديل، واعتقد كفاية جدا انا اكون مرتاحة وضميري مرتاح، ومافي داعي الواحد يعمل ليهو (شو) و(قومة وقعدة) عشان الناس تشوفوا عمل شنو، طالما انت متصالح مع نفسك دا كفاية جدا.

الفيديو المنتشر عكس حالة غضب شديد من الشباب تجاهك؟

بالمناسبة، انا عندي عشرين فيديو وانا قاعدة بغني وسط الجياشة والثوار، لكن في ناس قاصداني عديل عشان كدا اتجاهلت الفيديوهات ديك وركزت مع فيديو واحد وكدا (عيب) والله، وانا حاليا حاديكم كم فيديو وانا قاعدة اغني وسط الثوار والجياشة وهم بغنوا معاي، وياريت تنزلوهم في موقعكم مع الحوار دا عشان الناس تشوف وتحكم براها.

اخيرا… ماذا تقول إنصاف مدني للثوار؟

والله انا حابة اشكر كل الثوار في الميدان، شباب محترمين بالجد وقفوا معاي لما اختلفت مع الشباب ديك، واعتذروا لي عن الحصل وانا قلت ليهم انا ما زعلانة والله، لانو الثورة دي اهم حاجة جات عشانها الحرية.

ومن أبسط مقومات الحرية انو اي زول يعبر عن رأيو، حتي الناس البتكره انصاف من حقها تعلن الحاجة دي وتقولها، زي مافي ناس كتار جدا بتحب انصاف وبرضو تجاهر بالحب دا.

المصدر: خرطوم ستار/ دندش

اترك رد

X
X