رائج
الأصداف والشعب المرجانية جزء من أعمال المصممة هديل / خرطوم ستار

هديل محمد علي: أعمالي لمن فاته كورنيش بورتسودان

تلتقي خرطوم ستار المصممة هديل محمد علي متخصصه في تصميم الصدف والشعب المرجانية لتحدثنا عن تجربتها في الأشغال اليدوية التي تستخدم كأنعكاسات راقية لسيدة المنزل، والتي تستخدم فيها أبسط الأشياءالفكرة:

تقول هديل:” أنا من شرق السودان (بورتسودان) والفكرة جات من الفترة الأخيرة مع مهرجان السياحة حيث أنتشر صدف البحر وأعمالو بصورة واسعة، وأصبح الكورنيش معرض للسياح فانا حبيت إنو الناس الما جاتا فرصة تشوف حاجات البحر دي على الطبيعة أو ما بتعرف عنها حاجة أني أقدر اعكسها ليهم من خلال أعمالي وأنقل ليهم نطهة بسيطة من أجواء البور الجميلة “.

علاقة مفاتيح من تصميم هديل محمد علي / خرطوم ستار

تستخدم المصصمة هديل الصدف والشعب المرجانية كأساس لعملها وتقوم بجلب المواد الخام من شرق السودان خلال زياراتها المتكررة للمنطقة.

أما بقية المواد فتذكر هديل :” باقي الأشياء غراء وقلتر وخرز أقوم بجلبه من سوق أمدرمان (محلات الكلف) “.

نجم البحر والشعب المرجانية / خرطوم ستار

البدايات:

وتحدثنا هديل عن بداياتها ومدى قبول أعمالها لدى الناس فتقول:” البداية كانت بحاجات البيت ولما لقيت تجاوب وتشجيع من ناس البيت بعدها طلعت شغل للناس الحولينا والجيران وبعداك والحمد لله لقيت قبول وتشجيع منهم والعمل اتطور الحمد لله وبقا بزنس ماشي تمام “.

أكتر طلب بجيني على ترابيز القهوة وملحقاتها بصممها واللون على حسب رغبة الذبون، وباقي الشغل ذي التحف والشعب المرجانية، وعلاقات المفاتيح والأصداف بتكون حسب الطلب.

تربيزة القهوة هي الأعلى طلباً / خرطوم ستار

صراحة بعض الأشياء ما بحب أفرط فيها بخليها للمعارض أو تصوير تلفزيوني، بجد بحسها جزو مني ذي متحف وحابة تكون مرجع وتحقق أكبر إنتشار لأي زول عاوز يتعرف على أشياء البحر الجميلة وأسرارها.

أسعار المواد بالنسبة للصدف لأنو شغل تجاري بشتري بكميات بتعتبر ما غالية جداً، وفي حاجات على الطبيعة أحلى من غير إضافات ذي نجم البحر ده شكلو فبكتفي بإني أجيب النوع الجميل.

أما الشعب المرجانية فجزو منها بتلون بدينا شكل جميل برضو وفي أنواع تاني بشتغل منها تركيب وأطلع منو أشكال.

سوميتة البحر على الطبيعة / خرطوم ستار

اكيد في ناس كتيرين سبقوني في المجال دا لكن بحاول أضيف بصمة خاصه بي، أقدر من خلالا أوصل الرسالة العايزها بشكل مختلف.

 

المصدر: خرطوم ستار / إسراء عثمان

اترك رد

X
X